لا تغضب صديقى الوزير!

08/04/2015 - 1:21:45

منير فخرى عبد النور منير فخرى عبد النور

بقلم: سليمان عبدالعظيم

فى مصر ناس شاطرة قوى فى إضاعة الفرص.. تيجى لهم الفرصة على طبق من دهب.. نعمة يعنى .. فيرفسوها .. بالذمة ده كلام؟


الفرصة التى أتحدث عنها هى 5 مليارات دولار. الرئيس بوتين طلب من الرئيس السيسى فى زيارته الأخيرة للكرملين سلعاً ومواد غذائية وخضروات وفواكه بهذه القيمة .. بـ 5 مليارات دولار.. لكن يبدو أن أحداً فى الحكومة لم يعر هذا العرض المهم انتباها.. خلصت الزيارة الرئاسية الناجحة لكن نعمل إيه بقى فى اللى بيرفسوا النعمة رغم أنها جاية لهم على الطبطاب؟!


المشكلة أن فيه وزراء فى الحكومة حاطين وراميين حملهم كله على الريس السيسى .. يفتقرون إلى حل المشاكل "خارج الصندوق" .. لا يمتلكون حس المبادرة ماشى لكن إنهم لا يمتلكون آلية للمتابعة فهذا هو اللى مش ماشى!.


الريس السيسى الله يعينه ويقويه شغال 24 ساعة .. بيبتدى الشغل من بعد الفجر إلى ماشاء الله .. تقريبا لا ينام إلا 4 أو 5 ساعات .. اللهم ما صلى على النبى .. ومن شر حاسد إذا حسد.


رئيس الوزراء هو كمان شغال نحلة .. زيارات ميدانية واجتماعات مكثفة مع الوزراء وغير الوزراء .. نادر ما تلاقيه فى مكتبه.. الصبح فى زيارة تفقد.. والظهر فى محافظة .. والعصر فى مؤتمر .. ومعاك لليل وآخره .. شغل شغل شغل!.


لكن الحكومة فيها ييجى 33 وزير .. ولو كل وزير منهم عمل اللى بيعمله الرئيس السيسى ومحلب كان حال البلد اتقلب .. وبقينا فلة.. وعال العال ..


ده طبعا مش معناه أن "جميع" الوزراء مش واخدين بالهم كويس من شغلهم .. بصراحة فيه وزراء شغالين ومقطعين نفسهم وهدومهم من الشغل .. خد عندك أشرف سالمان وزير الاستثمار .. أشرف العربى وزير التخطيط .. خالد حنفى وزير التموين .. وكمان هانى دميان .. دول وزراء بيشتغلوا بجد .. وشغلهم بينور فى الإعلام وبيوصل للناس لأنه شغل حقيقى مش هزار ولا همبكة..


نرجع مرجوعنا لحكاية الـ 5 مليارات دولار اللى جاية طايرة من موسكو إلى القاهرة ومالقيتش حد فى حكومة 7 الصبح يكون فى استقبالها!


يا جماعة الخير .. دى عملية استيراد يعنى تجارة خارجية .. الدكتور خالد حنفى دى مش مسئوليته .. هوه مش فيه وزير مسئول عن تجارة مصر الخارجية؟ .. أيوه فيه .. حد يدلنى على سيادته علشان أقوله الحق الـ 5 مليارات دولار هاتضيع علينا .. كتر خيره الرئيس بوتين قال لرئيسنا السيسى هانشترى سلع ومنتجات غذائية بـ 5 مليارات دولار .. اعمل "معروف" يا معالى الوزير المسئول الحق بسرعة.. دول 40 مليار جنيه يا ناس!.


أول هذا الأسبوع سلطات جمارك روسيا قررت إقامة "ممر أخضر" يسمح بدخول السلع الغذائية فى وقت قصير حتى لا تتعرض الخضروات والفاكهة والمنتجات الغذائية للتلف بسبب الوقت الطويل الذى تستنزفه الإجراءات الجمركية الروتينية المعقدة..


يعنى الروس استعدوا .. طيب احنا يا ترى خدنا وضع الاستعداد .. ولا لسه ؟!..


أعرف أن صديقى منير فخرى عبدالنور كان ضمن الوفد الرسمى المصرى فى زيارة الرئيس السيسى لموسكو .. وبالتالى فقد عاش بنفسه تلك اللحظات .. لكن ما لا أعرفه هو: وماذا فعل سيادته بالضبط حتى لا تضيع على البلد وعلى المصريين تلك المليارات الخمسة من الدولارات؟!


لا أحد يعرف ماذا فعل سيادة الوزير؟ .. ما يعرفه الجميع أن الروس إذا وجدوا الأمر هكذا .. طناش مصرى .. هما كمان هايعملوا طناش روسى .. روسيا مش خسرانة حاجة .. هاتجيب كل الأكل اللى عايزاه من أى حتة تانية .. إنشاء الله حتى من بوركينافاسو .. ولا من كوالالمبور .. شوفوا مين بقى اللى خسران!


أرجوك، لا تغضب يا صديقى .. هذا ليس وقت المشاعر الشخصية.. فلنؤجلها .. أحبك وأقدرك نعم .. لكن حبى للبلد أكتر.. ومن هذا المنطلق أنا عاتب عليك لأنه مش معقول الفلاحين يخسروا الجلد والسقط ويبيعوا البطاطس فى الأرض بـ "30 قرش" لأن مفيش تصدير .


لم أسمع أنك قلت لزميلك فى الحكومة معالى وزير الزراعة إعمل حسابك روسيا عاوزة بطاطس وعاوزة خضار وعاوزة فواكه وموالح .. وعاوزة أى منتجات غذائية تسد بيها جوع المواطنين الروس بعد أن فرض الاتحاد الأوربى حظراً يمنعها من شراء ما تحتاجه من كل دول أوربا؟!


للأسف الشديد يا صديقى لم نسمع لك حسا ولم نقرأ لك خبراً فى مسألة مليارات دولارات روسيا الخمسة! .. وكأنك لست وزيراً لتجارة مصر الخارجية ولا أقول كأنك مازلت وزيرا للسياحة !


أعرف أن رجل الأعمال منير فخري عبد النور مستثمر شاطر .. أنتجت مربى " فيتراك " فصنعت امبراطورية من المربات التى لاتحتاج الأن أى إعلان لانها دخلت كل البيوت في الزمالك حيث تسكن وفي زينهم حيث كنت أقيم !


مرة أخيرة لاتغضب صديقي الوزير .. فقط استعد وفكر ماذا ستفعل عندما يأتى وزير التجارة الروسى إلي مصر بعد أيام قليلة؟