عندما انطلقت مع سامية صادق فى رحلة إلي القمر .. ليلي مرا د: كلمني يا قمر.. فهمني يا قمر

02/03/2015 - 10:47:42

 ليلي مرا د ليلي مرا د

الملف إعداد و تحرير - محمد المكاوى

في سنوات الستينيات قدمت الإعلامية القديرة سامية صادق برنامجا إذاعيا ناجحا باسم >هؤلاء والقمر< استضافت فيه قمم أهل الفكر والأدب والفن وكان من بينهم ملكة الفيلم الاستعراضي وصاحبة الصوت الملائكي >ليلي مراد< التي عادت وقتها عن قرار الاعتزال وسجلت للإذاعة المصرية عددا من الأغنيات وكان من أحدثها >دلوني يا المداوية< من كلمات نجيب بيومي وألحان محمد ضياء الدين وبالرغم من أن فكرة البرنامج خيالية، فقد كشفت إجاباتها عن رغبتها في العودة الي السينما ومتابعتها لكل جديد غنائي.


بقي أن نشير قبل أن نستمع إلي هذه الحلقة النادرة والطريفة إلى أن البرنامج من إعداد فاطمة محمود.


المذيعة: أهلا بمطربتنا المحبوبة ليلي مراد


ليلي مراد: أهلا وسهلا


المذيعة: طبعا القمر أول ما هايشوفك.. هايرحب بك ترحيب مضاعف لأنه هايقولك.. كلمنى كلمني يا قمر وأغانيك الحلوة بتاعة زمان دي


ليلي مراد: أيوه بس زي ما تقولي مخضوضة حبتين.. مش عارفة من حكاية القمر دي


المذيعة: من حكاية القمر واللا الحالتين


ليلي مراد: >ضاحكة


المذيعة: متهيألي أول حاجة هايسألهالك، هايقولك دلوقت ليلي مراد اللي كانت ولازالت لها جمهور عريض جدا، والناس بيحبوها قد كده هيه تقدر تبعد عنهم بس همه مايبعدوش عنها، هاتردي بإيه الاتهام ده؟


ليلي مراد: والله أنا مش بعيدة عن الجمهور بتاعي لأني بغني من وقت لآخر في الإذاعة.. يعني بعمل أغاني والحال ماشي.


المذيعة: وشايفة إنه كفاية؟


ليلي مراد: والله المفروض إني أرجع للسينما تاني لكن مش في إمكاني للظروف الموجودة في المؤسسة.


المذيعة: بعد الغيبة الطويلة عن جمهور الشاشة الفضية القمر طبعا هايقولك أول ما يشوف ليلي مراد هايفكر يعملها أكبر فيلم استعراضي ممكن يتعمل لها.. تفتكري يا مدام ليلي هاتحبي تختاري مين مخرج الفيلم القمري الاستعراضي وإنت ملكة الأفلام الاستعراضية؟


ليلي مراد: آه.. دي حكاية بقي عايزة تفكير في حكاية المخرج والحقيقة كان المرحوم الأستاذ أنور وجدي هو المناسب لكن طبعا مالناش دعوة بالأموات فنختار مثلا.. الحقيقة مش عارفة أقولك مين؟ وكنت أفضل اثنين مخرجين.. واحد عاطفي اللي هوه >بركات< وكنت أفضل مثلا >عاطف سالم< يعني الاثنين دول كويسين قوي.


المذيعة: كويسين يشتركوا مع بعض علي أي حال احنا في القمر برضه هانلغي الزمان والمكان يمكن أنك تختاري أنور وجدي؟


ليلي مراد: كده طب وهو كذلك.


المذيعة: طب مين البطل اللي تحبي يقوم قدامك بالبطولة؟ اذا كان ممثل واذا كان مطرب؟


ليلي مراد: اذا كان ممثل.. يبقي أنور وجدي و،اذا كان مطرب الاستاذ محمد عبدالوهاب.


المذيعة: إيه رأيك في الأفلام الاستعراضية اللي بتعرض دلوقتي اذا كان فيه أفلام استعراضية؟


ليلي مراد: والله حاليا مافيش.. أنا ما شفتش أفلام استعراضية أبدا.. إنت قصدك رأيي إيه.. أنا مش فاهمة السؤال بالضبط؟


المذيعة: يعني إنت شايفة أن فيه أفلام استعراضية ناجحة علي الشاشة العربية؟


ليلي مراد: لأ مافيش أفلام استعراضية مش شايفة.


المذيعة: طب إيه في رأيك مقومات نجاح الفيلم الاستعراضي.. إيه الإمكانيات التي يجب أن تتوافر له عشان ينجح ونقدر نقول عندنا فيلم استعراضي محترم؟


ليلي مراد: والله الحكاية.. حكاية ماديات مافيش كلام لأن الفيلم الاستعراضي بيتكلف كتير قوي، فهي طبعا الفلوس قبل كل حاجة وبعد كده.. القصة والمخرج.. والإمكانيات طبعا.


المذيعة: طبعا انت اشتغلت مع أنور وجدي وقام ببطولة أفلام قدامك حسين صدقي ونجيب الريحاني والأستاذ محمد عبدالوهاب ومحمد فوزي.. دول كانوا أبطال أفلامك، لو الصاروخ اللي هايطلع بيكي القمر في رحلة خيالية،.. هايقولوا لك تختاري مين منهم.. شخص واحد بس، مش عشان يمثل معاكي أو يلحن لك أو حاجة لا مجرد يصاحبك كرفيق في رحلة.. مين اللي تختاريه منهم؟!


ليلي مراد: أولا أنا مخضوضة قوي من حكاية الصاروخ اللي بتقولي عليه.. أنا مش عارفة هاطلع القمر إزاي.. أنا مخضوضة قوي.. وانا هاموت من الرعب.. >تضحك<.


المذيعة: لا.. ما تضخضيش صوتك هوه هوه حلو زي ما هوه ـ تضحك؟


ليلي مراد: يعني اختار الممثل قصدك؟


المذيعة: أي حد من الأشخاص اللي قلتهم كرفيق للرحلة يعني حاسة أنك في صحبته هانقضي وقت كويس؟


ليلي مراد: والله هاختار الأستاذ محمد عبدالوهاب


المذيعة: برضه


ليلي مراد: برضه


المذيعة: طب عشان إيه؟


ليلي مراد: أصل أنا بعزه جداً واحترمه وأقدره وطبعا هو يعرفني وأنا صغيرة خالص.


المذيعة: طب وإيه رأيك في ذكائه؟


ليلي مراد: لا دي بقي حاجة جامدة قوي ـ تضحك.


المذيعة: تضحك أيضا ـ طب إيه أهم حاجة كانت تميز المرحوم أنور وجدي؟ احنا هانتكلم عن الحسنات فقط؟


ليلي مراد: طبعا مقدرش أقول غير الحسنات، هو كان الحقيقة مخرج كويس قوي وكان قلبه طيب جدا.. كان عصبي قوي ولكن كان حنين ماكانش راجل وحش أبدا.


المذيعة: طب إيه أهم ميزة في محمد فوزي؟


ليلي مراد: أهم ميزة كانت طيبته.. طيب قوي زيادة عن اللزوم.


المذيعة: حسين صدقي.. هتقولي طيب برضه ـ تضحك؟


ليلي مراد: تضحك ـ لا شاطر.. شاطر قوي.


المذيعة: نجيب الريحاني؟


ليلي مراد: ده راجل فنان عظيم مافيش كلام.. راجل مالوش مثيل مجالناش حد زيه.


المذيعة: طب وإنت طيبة زي الناس مافاكرة ـ تضحك؟


ليلي مراد: تضحك بشدة.. طيبة بس لئيمة.


المذيعة: طيب.. لو طلبوا منك إنك تمثلي من غير ماتغني فوق في القمر هاتوافقي؟


ليلي مراد: والله ما افتكرش لأني برضه بحب أغني.


المذيعة: فيه دور معين قرأتيه في رواية، فعجبتك البطلة أو عجبتك الأحداث التي مرت بها أو أثرت فيكي بأي طريقة أو أخري وتتمني فعلا أنك تقومي بالدور ده؟


ليلي مراد: والله الفيلم اللي عملته وعجبني في حياتي، فيلم >ليلي< نفسي أمثله تاني بالتجارب اللي الواحد مر بيها دلوقتي والسنين اللي فاتت والسن اللي الواحد وصل له.. متهيألي إني أمثل الفيلم ده أحسن.


المذيعة: متهيألك أنك هاتضيفي له حاجة جديدة؟


ليلي مراد: لا.. لن أضيف حاجة جديدة لأن القصة حلوة قوي.


المذيعة: لا.. في الأداء؟


ليلي مراد: يمكن أحاسيسى هاتكون أحسن من الأول.


المذيعة: يعني هاتكون أكثر نضوجا؟


ليلي مراد: بالضبط كده.. يمكن أنا مش عارفة أوضح قوي ـ تضحك.


المذيعة: طيب.. إيه أحلي الأغاني اللي غنتيها، يعني لما القمر هايشوفك هايقولك.. أهلا ليلي مراد اللي غنت كذا وكذا؟


ليلي مراد: هايكلمني فعلا.


المذيعة: آه طبعا ـ تضحك؟


ليلي مراد: متأكدة ـ تضحك ـ الأغاني الحديثة اللي غنيتها >دلوني يا المداوية< حلوة قوي.


المذيعة: طب دي هانسمعها في نهاية البرنامج سوا وبعد إذنك.. إنما الأغاني القديمة بتاعتك اللي بتعتزي بيها؟


ليلي مراد: الأغاني القديمة.. بحب قوي >الحب الجميل< لأن الكلام واللحن حلو.


المذيعة: مدام ليلي بمجرد وصولك للقمر.. كيف ستقدمين نفسك اليه.. يعني فيه جملة واحدة هاتتكتب في البطاقة الشخصية.. >ليلي بنت مدارس< واللا >ليلي بنت ذوات< واللا >ليلي بنت الفقراء< واللا >ليلي< بس اللي هيه غادة الكاميليا واللا >ليلي مراد<؟


ليلي مراد: هاقول ليلي بنت الصاروخ.. تضحك.


المذيعة: تضحك ـ إنت ناوية يظهر علي فيلم بالاسم ده؟


ليلي مراد: ليلي مراد


المذيعة: لو فرض أنك عايزة تبعتي برقيات وانت علي سطح القمر للأشخاص.. أنا هاقول اسم الشخص وأنت تقولي نص البرقية اللي هاتبعتيها له؟ هاتبعتي مثلا برقية الي عبدالحميد جودة السحار.. تقولي فيها إيه؟


ليلي مراد: أخ.. أهي دي بقي انت ورطتني ورطة جامدة قوي دلوقتي لأني عايزة أقوله حاجات كتير قوي.


المذيعة: نركزهم في 3 كلمات؟


ليلي مراد: 3 كلمات.. أنا مستنية إنك تنتج لي فيلم.


المذيعة: برقية لعبدالوهاب؟


ليلي مراد: ربنا يدي له الصحة.


المذيعة: برقية لعبدالحليم حافظ؟


ليلي مراد: ربنا يقويه.


المذيعة: برقية لفريد الأطرش؟


ليلي مراد: برضه ربنا يدي له الصحة.


المذيعة: إيه بيبقي شعورك لما بتسمعي نجوم الغناء لما يحيوكي باستمرار، وأنا أذكر من أكثر من برنامج عندنا، لما كنا بنسأل نجاة وفايزة أحمد وشادية مين أحب صوت لكم، كانوا الحقيقة.. بالإجماع: صوت ليلي مراد، أولا ده مش مجاملة منهم لأنك فعلا نجمة تستحق كل التقدير خصوصا لما يكونوا من زميلات من نفس المجال.. انت شعورك إيه ولو إن انت أحيانا تحبي البقاء في الظل؟


ليلي مراد: والله بيبقي شعوري كويس قوي لأن أنا بحبهم كمان يعني من غير ما يقولوا أنهم بيحبوا صوت ليلي مراد، أنا بأسمعهم كتير وبأحب أسمع كل المطربات لأن كل واحدة لها لون.


المذيعة: وبتحسي إن الدنيا لسه بخير؟


ليلي مراد: طبعا مافيش كلام.. الحمد لله.


المذيعة: طب انت هاتودعي القمر.. هاتقولي له إيه كلام وهاتقولي له إيه مغني سواء لك أو لحد تاني؟


ليلي مراد: والنبي نزليني بقي من حكاية القمر لأحسن أنا تعبت.


المذيعة: ياللا.. إحنا راجعين سوا؟


وتنساب الي مسامعنا أغنيتها الشهيرة >دلوني يا المداوية< وكانت في تلك الأثناء أحدث أغنياتها للإذاعة.