فاطمة رشـدى : الشيخ سيد درويش؟ لولاه كنت أنا وأمى وإخواتى الأربعة نمنا على الرصيف

17/11/2014 - 12:28:07

فاطمة رشدى فاطمة رشدى

كتب - يحيى تادرس

عزيزتى/ عزيزى/ اعزائي القراء


قبل ان تقرأوا لابد من مقدمة وبعدها لكم ان تستكملوا القراءة أم تكتفون بهذا القدر.


أنا - وهذه الكلمة ستتكرر كثيرا ولى كل الحق فى تكرارها فالحكايات أو الحكاوي التى سأقصها عليكم كنت بحكم برامجى ومن أهمها وأشهرها: «كاميرا 9  كانت أيام وحكاوى القهاوى» شديد الصلة بعدد من الفنانات والفنانين- وفى جوانب لم تذكر فى «صحف سيارة أو مجلات أو...»


هكذا تحدثت فاطمة رشدى فى حكايتها الأولى


أول ما نحكي:


ساعات با اركب تاكسي وأغمض عينيه وأقول للسواق.. لف بيه البلد لحد ما أقول لك كفاية.


طول ما التاكسي بيلٍّف باشوف ناس غير الناس.. وباسمع كلام ما حدش غيري بيسمعه.


.. هتافات باسمي.. زحام معجبين..بوكيهات ورد.. كاميرات.. أتوجرافات.. والناس موش مصدقة إني أنا فاطمة رشدي- ماشية وسطيهم.


... عيني بتتملي دموع وافتحها واسأل نفسي.. كل ده راح فين يا فاطمة.


.. الناس ولا إنني اللي تاهوا عن بعض.


[هكذا بدأت (فاطمة) حديثها معي في أحد فنادق وسط البلد (شارع عدلي).- حيث لم يكن لها مسكن تأوي إليه].


...


إسمع..أنا عايزاك تروح معايا قصر [علي فهمي] في أول الزمالك..وذهبنا..تعرف مين صاحب القصر ده؟


- ده قصر علي بيه فهمي.


وبصوت حاكم - .. علي بيه كامل فهمي.. وعارف مات ازاي كنت أعرف .. - لكنني فضلت أن تجيبني هي.


.. اتقتل علي إيد مراته الفرنساوية (مرجريت) اللي كانت متجوزة قبل ما يتجوزها..


..والغيرة [تستكمل الحديث - كانت السبب].


...


معلومات [علي بيه كان ملحق بالمفوضية المصرية في باريس..


.. تعرف علي مدام مرجريت وتزوجها في ديسمبر 1922 وهكذا أصبح اسمها مرجريت فهمي.


.. وفي التاسع من يوليو 1923 كانا يتناولان العشاء معا علي بيه ومرجريت في فندق سافوي في باريس.


... وحينما يتقدم إليها قائد الأوركسترا يسألها أن تختار معزوفة معينة يعزفها لها ترد ردا بالغ الغرابة.


.. شكرا.. زوجي سوف يقتلني خلال أربع وعشرين ساعة.


.. وهذا بالظبط ما حدث


.. واستكمالا لهذا الحديث المثير: يقول الطبيب [د. جوردون] أن - مرجريت - صرحت له بأنها قد أطلقت علي زوجها ثلاث رصاصات قاتلة.


...


زوجة معترفة - وبيدها أداة الجريمة - كان المفترض أن يحكم عليها بالإعدام ولكن: يدافع عنها المحامي الإنجليزي الأشهر وقتها سير [مارشال هول] - ويستطيع أن يستصدر لها.. حكما بالبراءة)- وبني دفاعه علي أن الزواج كان صراعا بين وحشية الشرق [علي بيه فهمي) وحضارة غرب (مرجريت فهمي].


معلومات أخري ليس هذا بحالها ولكن تتوقف عند قرار تصدره الحكومة المصرية في أوائل الثلاثينات - يمنع زواج المبعوثين إلي الخارج بأجنبيات...


باقي وتفاصيل هذه الواقعة بالغة الإثارة - في حكاوي قادمة]


.. وقد تتساءل - عزيزي القارئ.


ماصلة هذه الحكاية المأساوية بفاطمة رشدي:


...


ترد السيدة فاطمة


- كان عايز يتوزني.. رفضته... واتقتل بسببي!


وتستكمل (فاطمة)


...


لما رفضته - والدتي ثارت في وشي.


- بقي لما ربنا عايز ينصفنا أنا وإخواتك ويسعدك سعادة لا قبلها ولا بعدها نقوم إحنا نتبطّر ع النعمة.. إنتي عارفة الشاب ده مين؟ من عيلة مين..عايز يدفع لك مهر أو إيه؟ ويقدم لك إيه.


- أنا مستقبلي كله في المرسح.


- سلامات يا مرسح.


...


- وأنا با اتكلم لازم تبص في عينيه .. لما كنت باقف ع المرسح كنت أبص في عيون اللي بيقفوا قدامي؛.. علي طول يحسوا بالدرامة..


وتضحك بانفعال


.. أنا حياتي كلها دراما


.. والدي اتوفي والسماسرة ضحكوا علي والدتي اللي كانت عايزة تلمنا في بيت يتقفل علينا.. خمس بنات وأمهن..


.. أختي كانت بتشتغل ف مرسح أمين عطا لله في اسكندرية وفي ليلة عمري ماهاانساها.. أختي كانت عيامة وأنا طلعت بدالها وغنيت (طلعت يا محلا نورها).


كان مين قاعد بين الجمهور؟ الشيخ سيد درويش.. ندهلي وبص لي وشافني طفلة مسلوعة وهدوم موش ولابد.. مد إيده لوالدتي بعشرة جنيه.. وطلب مننا نسافر مصر نشتغل وياه.


.. عشرة جنيه.. دفعنا إيجار الشقة المتأخر وأكلنا سمك مشوي واشترينا فساتين ولا مؤاخدة أحذية.


...


وقعدنا ف لوكاندة في شارع كلوت بك.


.. كنا بنصرف منين؟.. الشيخ سيد تكفل بينا - كان راجل عظيم..


لولاه كنا اطردنا م الشقة ونمنا ع الرصيف.


.. نجيب الريحاني


وتتوقف لتتذكر


الشيخ سيد خدنا بربطة المعلم لشارع عماد الدين.. وتضحك [أيووووه] بنات إيه ورجالة إيه.. دنيا تانية... وهناك بقي قابلت نجيب الريحاني..


كان بيمثل (كشكش بيه)


.. البنات اللي معاه كن كلهن ألافرنجة


..نجيب شافني.. ضمني وباسني


.. أول مرة حد يبوسني


وتضحك.. بعده كده ياما اتبست لكن - عمري ما هانسي أول (بوسة) وأول حضن.


...


إسمع.. إنت عزمتني كتير (كانت كلها وجبات (ساندوتشات فول وطعمية).. ودلوقت أنا اللي ها أعزمك..


[وجبة سمك فاخرة وخلالها كان الحديث يدور بتلقائية وخفة دم دمها هي بالطبع].


.. أنا ياما اتعزمت في بيوت باشوات وبكوات وعمد وأعيان و(تضحك.. وولاد البلد في روض الفرج.. ولو سألتني اشمعني روض الفرج ها أقولك علي طول (مونت كارلو].


.. روض الفرج ده كانوا زمان بسموه (روضة العشاق).. وكان مليان مراسح (مسارح) أشهرها.. مونت كارلو.. كان عمري وقتها 13 سنة لكن إيه جمال وأنوثة وشوية غرور ما أقول لكشي.. وكنت باغني.. كنت البريمادونة.. وفاكرة م التخت محمد القصبجي بتاع أم كلثوم.


كان الجمهور بينقسم نصين.. شمال ويمين - ولازم لو ضحكت ضحكة للي قاعدين في الشمال أغمز غمزتين لجمهور اليمين .. وياما معارك دارت بسببي.


.. أقول لك ايه ولا إيه..


.. أمير م العيلة المالكة وعايزني أغني في القصر بتاعه.. رحت يا أخويا مالقيتش غيره وناس بتقول له ياصاحب السمو.


.. صاحب السمو اتخضيت.. لكن صاحب السمو بعد ما سكر.. طبعا ماسكتلوش وضربته بالقلم عشان يفوق.


.. تضربي صاحب السمو بالقلم؟!


...طلعت أجري لحد ما روحت واستخبيت أحسن صاحب السمو يطلع لي...


ياما جالي جوابات معجبين طلبة وأعيان وهدايا دهب وألماظات.


..إسمع .. تعرف فكري بك أباظة؟


- طبعا ونهضت وأخذت تبحث في حقيبة ضخمة مليئة بالصور والمجلات والجرائد) حتي عثرت علي أحد أعداد جريدة الجمهورية (31 يوليو 1969).


.. اقرأ فكري بك كتب عني إيه.


الصغيرة الحسناء التي دخلت قلوب أبناء جيلي..


وشوف صالح بيه جودت كتب عني إيه في مجلة الكواكب(أول سبتمبر 1960).


.. فاطمة رشدي.. وكلمتا فاطمة رشدي معناها أربعون سنة من تاريخ المسرح المصري.


..


وشوف محمود المليجي كتب عني إيه في جريدة الجمهورية (17/12/70) فرقة فاطمة رشدي كانت مدرستي الأولي.


... وتتنهد.. وتغلق الحقيبة.


..


الحب في حياتي؟!


- أعظم حب كان في مسجد الأباصيري لما كنت باردد مع المنشدين آيات القرآن الكريم.


.. وتصمت برهة ثم تنطق فجأة..


عزيز عيد


.. كان بيحبني حب جنوني.. وكان واقف زي السد بين المعجبين وبيني.. وكان يختارلي قصائد أقولها واحفظها عشان أتقوي في اللغة العربية.


وترفع راسها ثم تنهض فجأة وتردد إحدي قصائد أبي العلاء المعري


الموت باب.. كل الناس تدخله


ياليت شعري بعد الباب - ما الدار


...


إني وإن كنت الأخير زمانه


لآت بما لم تستطعه الأوائل


..


يوسف وهبي؟


يوسف بيه وهبي ابن الباشا اللي ضحي بكل شئ من أجل الفن..


.. رواية المجنون.. الطاغية وبطولته بعدما تركت السيدة روزاليوسف الفرقة.


.. والنسر الصغير اللي أديت فيها دور كانت بتمثله قبلي (سارة برنار).


وبعدها أطلقوا عليه لقب


وترفع رأسها بكبرياء.. سارة برنار الشرق


..


سارة برنار (1845 - 1923)


.. ممثلة فرنسية شهيرة - اسمها الأصلي (روزين برنار)


... وتعتبر من أعظم الممثلات اللاتي ظهرن علي المسرح لا في فرنسا وحدها ولكن في العالم أجمع.


.... نالت شهرتها علي مسرح الكوميدي فرانسيز في عدة مسرحيات.. لكبار الكتاب خاصة وليم شكسبير.


- وعلي فكرة.. أنا شفتها في فيلم صامت وحسيت ساعيتها بالفخر..


بقي أنا فاطمة رشدي أبقي سارة برنار الشرق؟


.. وتتنهد. وتتوقف عن الحديث - وكأنما شهرزاد بعد أن يصيح الديك.