احنا والوزير.. والمحشى

02/11/2016 - 10:40:43

  سليمان عبدالعظيم سليمان عبدالعظيم

بقلم - سليمان عبدالعظيم

بلاش محشى دلوقتى!..


هكذا كانت إجابة سيادة الوزير عندما سأله الصحفيون: هل تفكر وزارة التموين فى استبدال الأرز بالمكرونة؟!


الوزير اعترف للصحفيين بأن «معندناش مشكلة فى الرز.. ما الرز موجود.. أنا بقول تانى للمزارعين الشرفاء والتجار الشرفاء والموردين الشرفاء مايصحش إنك تهرب الرز لدول مجاورة وتحرم المواطن المصرى من هذا الرز»!!


«بلاش محشى دلوقتى»


الحل عند سيادة الوزير الهمام كان بسيطًا جدا، لكن أيضًا غريب جدا.. بفرمان سلطانى برقوقى قال للناس: بلاش تاكلوا محشى دلوقتى. هو ده الحل العبقرى عند معالى اللواء الدكتور محمد على مصيلحى وزير تموين كل المصريين.. أكيد ده حل من خارج الصندوق. وإلا ماكانش السيد الوزير قاله للناس ببساطة كده: بلاش المحشى اليومين دول يا مصريين.


ناس هاتقول سيادة الوزير غلط. ماكانش يصح تطلع منه كلمة المحشى دى (رغم أننا كلنا بنحب المحشى ونموت فيه موت)!.. وناس تانية هاتقول للناس الأولنيين وماله لما يقولها. هو كلمة المحشى دى عيب؟!.. وناس تالتة هاتقول ما كان سيادته يقول الرز زى الرز.. ولا يعنى حبكت معاه القافية فقال كلمة محشى؟... بلا قافية ومالها كلمة محشى؟ !.. ده أحسن حاجة بتتاكل اللى بتتحشى كويس.. الوزير «ماغلطش فى البخارى».. شاور على حاجة الناس كلها بتحبها وبتحب تاكلها فى كل وقت وفى أى وقت.. غلط يعنى؟..


أيوه معالى السيد الوزير غلط.. لكن هل غلط غلطة عمره؟.. لا.. أمال إيه؟..


كان يبقى غلطان وستين غلطان لو قال «بلاش لحمة دلوقتى.. أو لو قال بلاش فراخ دلوقتى.. أو لو قال بلاش سمك دلوقتى».. الراجل ياجماعة الخير خايف تحصل بكرة ولا بعده أزمة رز.. قوم إيه.. قال يا شعب مصر.. بلاش محشى دلوقتى!.


معالى الوزير مغلطش.. وكمان والعياذ بالله ماكفرش.. هو صحيح كان ممكن سيادته يقول اللى هو عايزه بأى معنى، لكن بلاش كلمة محشى دى اللى الولاد الشياطين بتوع اللجان الإلكترونية إخوان ومش إخوان مسكوا فيها وهات يارغى وتويتر وتغريد على الفيس بوك ومواقع التواصل الاجتماعى: شفتم وزير التموين اللى بيكره المحشى.. شفتم الوزير اللى عايز يحرمنا من محشى الكرنب وورق العنب ومحشى الفلفل ومحشى الباذنجان ومحشى الكوسة؟!


معلش ياسيادة الوزير كلمة وطاشت.. استلمها ولاد الإيه وفضلوا يلعلعوا بيها.. معلش يادكتور مصيلحى عديها المرة دى.. بس أمانة عليك يا شيخ.. آسف يا معالى الوزير.. بلاش تقول حاجة تانية زيها.. زى المحشى وياريت معاليك تراعى أن فى البلد اليومين دول ناس قاعدة مستنية الحكومة تغلط غلطة واحدة عشان يقبضوا ويلعلعوا!.


سيادة الوزير المحترم غصب عن عين ولاد الإيه دول.. سايق عليك النبى قبل ما تتكلم دور على أفضل كلمة تعبر بها عما تريد أن تقوله للناس..


أقول قولى هذا وأنا ممتن لك جدا سيدى الوزير، فقد فكرتنى جملتك التى أصبحت على لسان كل الناس بأفضل أكلة ها أروح أقول لمراتى عليها: «اعملى لينا بكرة حلة محشى كرنب وورق عنب وفلفل وباذنجان.. والذى منه وإياك حد يقولى بلاش محشى!»!