عيب عليكم يا أهل الفن!

27/07/2016 - 10:20:04

  سليمان عبدالعظيم سليمان عبدالعظيم

بقلم - سليمان عبدالعظيم

أرجو أن تسامحنى السيدة جيهان السادات على إفشاء هذا السر الذى كشفته لى فى حوارى الأخير معها منذ أكثر من شهر!.


الحكاية وما فيها أن السيدة جيهان السادات استجابت لدعوة الرئيس السيسى لها بالمشاركة بمجهوداتها واتصالاتها ومعارفها لحث الناس على التبرع لصندوق تحيا مصر.. مش هو ده السر لأننا كلنا عارفينه.


دعت السيدة جيهان بعض شخصيات ثرية من معارفها وأصدقاء مقربين إليها، على عشاء فى منزل الرئيس الراحل أنور السادات تكرر مرتين فتحت السيدة جيهان الموضوع أمام ضيوفها: البلد محتاجة ياريت يا جماعة نلبى النداء ونتبرع لصندوق تحيا مصر.


فى التو وجدت دعوة السيدة جيهان استجابة واسعة.. صاحب شركة بترول خاصة تبرع بمليون جنيه ومليون آخر باسم زوجته.. التبرعات انهالت خلال مأدبتى العشاء.. الرقم وصل إلى ٢٣ مليون جنيه أرسلتها السيدة جيهان بمذكرة إلى الرئيس السيسى فوراً لتودع فى صندوق «تحيا مصر».


الفنانة الكبيرة يسرا كانت موجودة بحكم صداقتها للسيدة جيهان من جهة ولأمر آخر قدرته السيدة جيهان.. يسرا أصبحت الآن فى هذا الاجتماع مكلفة من السيدة جيهان بالاتصال بزملائها الفنانين والفنانات من أجل حثهم على التبرع للصندوق.. التبرع لمصر.


فى صباح اليوم التالى مباشرة ذهب الفنان الكبير عادل إمام إلى البنك وتبرع لصندوق تحيا مصر بمبلغ ١٠ ملايين جنيه.. امال إيه.. مش هو الزعيم؟!.. عادل إمام يعمل كده ويعمل أبوها.. مش هو برضه الزعيم!..


بعد لما الزعيم فتح المزاد ب١٠ ملايين .. “الأسطورة” على طول راح اتبرع بـ ٢٠ مليون جنيه.. أمال إيه مش بقى أسطورة.. محمد رمضان اللى بيقولوا أنه ها ياخد ٤٨ مليون جنيه فى فيلمه القادم قالها فى سره بلاها الرولزرويس وبلاها اللامبورجينى أعمل بيهم إيه.. مصر أولى بفلوس ولادها.. كفاية علي إنى أخدت مسرح الزعيم بشارع الهرم.. دخل فى الدور الجدع اللى بيلعب فى النار.. رامز جلال غار ودمه فار وقال: على أنا كمان بـ١٠ملايين جنيه!.


وبعد الزعيم والأسطورة انهالت تبرعات أهل الفن والمغنى على صندوق تحيا مصر.. الكل قال فى نفسه يا عيب الشوم إزاى ما نتبرعش؟


كلهم قالو زعيمنا الهمام عادل إمام يقول علينا إيه؟.. رمضان بتاع الرولزرويس واللامبورجينى الناس قالت عليه: والله واد جدع بيحب البلد قوى.. الله يفتح عليه أكتر وأكتر.. كتر ألف خيره إن قلبه على الناس وعلى البلد.


مش بس عادل إمام ومحمد رمضان اللى اتبرعوا بس مش بملايين أى نعم هما اتبرعوا بملايين الجنيهات لكن غيرهم كمان اتبرعوا..


خد عندك إلهام شاهين اتبرعت.. أحمد عز اتبرع.. كريم عبدالعزيز اتبرع.. ومنى زكى ومنة شلبى وباسم سمرة.. و.. و.. و.. ماتعدش!!


•••


اوعى حد يصدق اللى قلته فى الفقرات الثلاث السابقة.. لا عادل إمام اتبرع ولا ابن رمضان عملها.. باختصار ولا حد من الفنانين والفنانات اللى قلت أسماءهم دول راح اتبرع ولو بـ١٠٠٠جنيه لصندوق تحيا مصر!


واحد صاحبى قرارى قال لى: والله خايف يكون الفنانون دول ما بيدفعوش كمان الضرائب اللى عليهم.. قلت له: تبقى فضيحة.. وبجلاجل!


خيب أهل الفن أملنا فيهم.. لم يستجيبوا لنداء الوطن.. قالوا للفنانة يسرا حاضر.. حاضر.. ولم يفعلوا شيئاً.


عندما سألت السيدة جيهان السادات يسرا بعد شهر من حفل العشاء الثانى عملتى إيه يا يسرا مع زملائك؟.. قالت بأسى شديد: للأسف.. محدش من كلام زملائى الفنانين اللى كلمتهم استجاب!


والله العظيم.. عيب عليكم.. يا أهل الفن!!