نيللي وصبري ومي وآسر .. الفنانون يعلقون على سباق رمضان 2016

20/06/2016 - 9:10:19

كتبت - نيفين الزهيرى

مع عرض الحلقات الأولي من أعمال ومسلسلات رمضان، بدأت موجة من التعليقات والانتقادات بين الإشادة والرفض لهذه الأعمال أو توجيه الانتقاد الشديد لها، ومن أهم التعليقات التي انتشرت على مواقع التواصل الاجتماعي الذي يعتبر أكبر ساحة لمعرفة الآراء بشكل واضح وصريح وهى توضح عدداً من المؤشرات، ومن هؤلاء النجوم وتعليقاتهم...


آسر ياسين : "أنا عارف قد ايه الموضوع بيبقي صعب لكل زملائي في المهنة للتجهيز للشهر ده..بعيداً عن المنافسة ونسب المشاهدة افرحوا بالشغل اللي تعبتوا فيه واللي بعضكم لسه بيتعب فيه".


سلوي محمد علي : "مبحبش الدراما اللى تحس انها فى الاصل معادلة رياضية، بحب العفوية"، وأضافت " ومازلت افتقد نور الشريف فى رمضان نور الشريف اللى كان همه ضخ دم جديد فى الصناعة، نور الشريف اللى معظم نجوم الصف الاول اللى النهاردة شايلين مسلسلات لوحدهم من اكتشافه رحمه الله".


نيللي كريم : "عايزة أهني كل زملائي الممثلين والمخرجين وكتاب السيناريو والمنتجين على شغلهم، واتمني لكل واحد النجاح، فإحنا مش في الألعاب الأوليمبية، عشان كده كلنا نقدر نفوز وننجح، شغلنا عامل زي اللعبة المصرية، والدراما المصرية تكسب".


صبري فواز : " إحنا مابنعملش حاجة حرام .. إحنا بنشتغل .. زينا زى أى مهنة .. واللى عايش جوه المهنة آكل شارب وجايب العيلة والصحاب ياكلوا بوغاشة .. وشايف إن الفن حاجة يايّاااه .. يتفضل يشوف له شغلانة تانية ....... بس الأول يسيب الفلوس اللى كسبها من الفن ومايستغلش شهرته فى شغلانته الجديدة الشريفة المرارة أصلاً مفقوعة .. والمشرحة مش ناقصة قتلى".


مي عز الدين : " مخرجي العزيز ابراهيم فخر شكرخاص ليك من قلبي علي تعبك معايا كل سنة ومجهودك الخرافي اللي بتبذله وانا أدري واحدة بيه لأنك بتبتدي معايا المسلسل من وهو لسه فكرة لغاية ما يطلع العمل ده للنور ولم تخيب ظني أبدا بشكرك علي مجهودك مع الممثلين والكادرات الحلوة وغيره وغيره علشان تطلع العمل في الآخر بالشكل المشرف ده ، بشكرك يا _شريك النجاح وربنا يكتبلنا النجاح دايما مع بعض يا رب ده غير حبي ليك علي المستوي الشخصي انت بقيت بالنسبالي واحد من أسرتي مش زمالة شغل وبس ... تحية للمخرج المبدع إبراهيم فخر _شكرا علي وعد".


المخرج تامر عزت : "احلى حاجة في الدنيا (بالنسبة لي) لما تتفرج على أداء ممثل يبهرك. انا باحب الممثلين لأَنِّي كنت بامثل مسرح فترة وعارف قد إيه مهنتهم صعبة وحساسة وبتخليهم زي المنخل من جوه ولما الممثل ينسى البرستيج والافيش واللبيس بتاعي والكارافان وكل الحاجات دي ويمثل بس .. الناس بتحس بيه من اقل حاجة. من نظرة عين بتاعة الشخصية او حتى لحظة صمت غير متوقعة. كل رمضان بنكتشف مين من الممثلين شغال فعلا على نفسه وأحاسيسه وأدواته وفيه ناس مدهشة وبتتطور من سنة لسنة. برافو".


المنتج أحمد سمير : "بصراحة عايز أوجه الشكر لكل زملائي فى المهنة على جميع المستويات على المجهود الكبير اللى عملوه ولسه بيعملوه لحد دلوقتي وبتمنالهم كلهم التوفيق والنجاح وأرجع تاني واقول القمة تستحمل تشيل كتير مش واحد ولا اتنين ولا حتى عشرة الفن ابداع مش مسابقة ...... مبروك لكل الناس اللى شايله على كتفها الصناعة المحلية الوحيدة 100% وإن شاء الله دايما مصر في المقدمة وتحية لكل القنوات الداعمة لهذه الصناعة وبالتوفيق للجميع".


المنتج طارق الجنايني : " مشروع مسلسل الميزان اللي إبتدا بأكلة سوشي في دبي من 9 شهور بدأ يتذاع، المسلسل ده اتعمل في ظروف صعبة جداً وعدينا فيه بحاجات كتير أوي بس أنت كنت دايماً راجل واستحملت معايا، ده غير أنك حقيقي من أكتر الناس الموهوبة اللي اشتغلت معاها في حياتي، الحمدلله أنا متفائل بنجاح الميزان جداً ومعنديش شك إن ربنا هيكرمنا على قد تعبنا في المسلسل ده".